Më pak se një muaj pas emërimit të Eni Vasilit në krye të Radio Televizionit Shqiptar, ky institucion publik është përballur me një incident të rëndë kibernetik. Të hënën pasdite, rreth orës 18:00, faqja zyrtare e RTSH-së dhe profilet në rrjetet sociale u goditën nga një sulm hakerash, që dyshohet të jenë me origjinë nga Serbia.

Për disa orë, në platformat online të RTSH-së u publikuan mesazhe dhe lajme të rreme, përfshirë tituj provokues si “Shqipëria tërheq njohjen e Kosovës” dhe “Kosova është Serbi”. Ky akt ka shkaktuar shqetësim të madh në opinionin publik, sidomos për ndjeshmërinë politike që mbartin këto deklarata.

RTSH e konfirmoi zyrtarisht sulmin përmes një reagimi në rrjetet sociale gjatë orëve të vona të natës, ku i kërkoi ndjekësve të mos ndërveprojnë me përmbajtjet e publikuara gjatë kohës që sistemi ishte i komprometuar.

Për drejtoreshën e re Eni Vasili duket se puna nuk ka nisur me këmbë të mbarë, pasi kanë kaluar vetëm tre javë nga marrja e kësaj detyre. Emërimi i saj në krye të RTSH-së u prit me polemika, ku zëra kritikë e cilësuan si një përpjekje për të politizuar më tej një media si zgjatim të propagandës qeverisëse, kur në të vërtetë televizioni publik duhet t’i shërbejë me informacione të paanshme atyre që e financojnë, që në këtë rast janë shqiptarët e thjeshtë.