Një turist nga Maqedonia ka dërguar një mesazh shqetësues nga Shengjini, duke denoncuar kushtet e rënduara të plazhit dhe shërbimin e dobët në një prej resorteve të zonës. Sipas tij, përballë resortit kanalizimet kalojnë në ujë dhe deti është shumë i ndotur, duke e bërë qëndrimin aty të papranueshëm.

Kur ai u përpoq të ankohej në hotel, iu përgjigjën me indiferencë, duke thënë se situata është edhe më keq se sa duket dhe se ndotja është e pranishme në masë të madhe. Pasi kërkoi largimin nga hoteli me kusht që të kompensohej për një natë që kishte qëndruar, iu tha se “paratë kanë ikur” dhe nëse dëshiron të largohet, duhet ta bëjë pa kompensim.

Ky rast ngre shqetësime serioze për cilësinë e shërbimeve turistike në zonën e Shengjinit dhe tregon nevojën për ndërhyrje urgjente nga autoritetet për të siguruar standardet e nevojshme të pastërtisë dhe mbrojtjes së ambientit.

Mesazhi i plotë nga qytetari:

“Përshëndetje JOQ, jam turist nga Maqedonia, dhe jam duke pushuar në Shengjin te Resorti Tanusha. Përballë resortit është nxjerrë jashtë kanalizimi dhe deti është shumë i ndotur. Kur shkova të bëj ankesë te hoteli më tha që: ‘Ka edhe më keq, hajde mirë është.’ Tani i kërkova që të largohem nga hoteli me kusht që të kompensoj një natë që jam këtu, më tha s’bën, paratë kanë ikur. Nëse do të largohesh, ik, por para s’ka më.”