Një aksident tragjik detar ka ndodhur të mërkurën në mbrëmje në Indonezi, ku një traget është përmbysur në rrugën drejt ishullit turistik të Balit, duke lënë të paktën katër persona të vdekur dhe 29 të shpëtuar.

Sipas një deklarate të agjencisë së shpëtimit me seli në Surabaya, trageti kishte në bord 53 pasagjerë dhe 12 anëtarë të ekuipazhit. Mjeti lundrues u mbyt rreth orës 23:20, vetëm gjysmë ore pasi ishte nisur nga porti i Ketapang në provincën Lindore të Javas, me destinacion portin Gilimanuk në Bali – një udhëtim i shkurtër prej rreth 50 kilometrash.

Shkaku i përmbysjes mendohet të ketë qenë një rrjedhje në dhomën e motorit, sipas raporteve të para hetimore. Deri më tani nuk është konfirmuar nëse në bord ndodheshin të huaj.

Operacionet e kërkim-shpëtimit janë duke vazhduar edhe këtë të enjte, ku po marrin pjesë nëntë mjete detare, përfshirë dy rimorkiatorë, dy anije të fryra, peshkatarë vendas dhe ekipe nga toka.

Kushtet e vështira të natës – përfshirë errësirën dhe dallgët deri në 2 metra – kanë penguar ndërhyrjen e ekipeve të shpëtimit. Megjithatë, autoritetet njoftojnë se moti dhe gjendja e detit janë përmirësuar në mëngjesin e së enjtes, duke rritur shpresat për gjetjen e të mbijetuarve të tjerë, do t’iu jemi mirenjohes nese do te na ndihmonit që të mirmbajmë faqen vetëm duke shtypur(mbi foton) që ndodhet më poshtë.Faleminderit për mirkuptimin SHQIPE