Një rast i pazakontë ka përfunduar në Gjykatën Administrative të Tiranës, ku një e moshuar 82-vjeçare po sfidon një gjobë të vendosur nga Agjencia e Mbrojtjes së Konsumatorit (AMK), pasi ka ushqyer macet endacake pranë banesës së saj.

Zonja Irini, e cila jeton në Tiranë, ka qenë prej vitesh një kujdestare e maceve të rrugës, përveç atyre që mban vetë në shtëpi. Por përkushtimi i saj ndaj kafshëve ka sjellë përplasje me autoritetet, të cilat e kanë gjobitur me 10 mijë lekë për “ndotje akustike”, duke i kërkuar të largojë menjëherë macet nga ambienti përreth.

E moshuara ka refuzuar të pranojë gjobën dhe ka nisur një betejë ligjore, duke e çuar çështjen në gjykatë. Avokatja e saj, në një prononcim për Top Channel, ka theksuar se nuk ekziston asnjë ligj që ndalon mbajtjen apo ushqimin e maceve, veçanërisht kur ato nuk shkaktojnë dëm të drejtpërdrejtë.

Aktualisht, Gjykata Administrative ka hedhur shortin për çështjen dhe pritet të shqyrtojë kërkesën për sigurim padie në mënyrë të përshpejtuar – një hap ligjor që, nëse pranohet, do të pezullojë përkohësisht pagesën e gjobës deri në përfundimin e shqyrtimit të plotë të çështjes.

Zonja Irini, një figurë që ka fituar simpati në komunitet për dashurinë ndaj kafshëve, e konsideron vendimin e gjobës jo vetëm të padrejtë, por edhe një precedent negativ për trajtimin e kafshëve të rrugës.