Duke ecur nëpër shkurre të dendura, historiani vendas Nenad Mihajloviç heq degët për të zbuluar varrin. Sipas vendasve, është vendi i varrimit të humbur prej kohësh i Petar Blagojeviçit, i njohur si babai i vampirëve.

Bazuar edhe në dokumentet historike, Mihajloviç dhe banorët e fshatit shpresojnë që Kisiljevo, rreth 100 kilometra në lindje të Beogradit, të fitojë famën si vendlindja e vampirëve dhe të tërheqë turistë nga e gjithë bota.

Në verën e vitit 1725, shumë para se shkrimtari irlandez Bram Stoker të caktonte Transilvaninë si shtëpinë e famshme të Drakulës, banorët e këtij fshati hapën varrin Blagojeviçit, duke dyshuar se ai ngjallej natën për të vrarë vendasit.

“Petar Blagojeviçi u gjet krejtësisht i paprekur,” kujton Mirko Bogiçevic, ish-kryetar i fshatit dhe anëtar i familjes që ka jetuar aty prej 11 brezash. “Nga goja dhe veshët i rridhte gjak i freskët,” tregon Bogiçeviç.

“Ai ndoshta ishte vetëm një njeri i zakonshëm që pati fatin apo fatkeqësinë të bëhej vampir. Gjithçka që dimë është se vinte nga Kisiljevo dhe emri i tij përmendet në dokumente të viteve 1700,” shton ai, duke treguar kopjen e gazetës austriake “Wienerisches Diarium” me datë 21 korrik 1725.