Ambasadori i Bashkimit Evropian në Shqipëri, Silvio Gonzato, i dorëzoi sot kryeministrit Edi Rama raportin e progresit të Komisionit Evropian për vendin tonë.

Në konferencën e përbashkët me kreun e qeverisë, Gonzato e cilësoi këtë raport si një vlerësim të qartë të rezultateve konkrete që Shqipëria ka arritur në rrugën e saj drejt Bashkimit Evropian.

“Raporti i këtij viti publikohet në një moment të rëndësishëm për integrimin e Shqipërisë në BE. Pesë nga gjashtë grup-kapitujt janë tashmë të hapur, dhe kjo është arritur me një shpejtësi të jashtëzakonshme,” – u shpreh ambasadori Gonzato.

Ai shtoi se Shqipëria ka përmbushur 21 masa reformuese gjatë vitit 2024, çka i hapi rrugën Komisionit Evropian të disbursonte 93 milionë euro në mbështetje të reformave dhe zhvillimit institucional.

“Ky është një moment unik që duhet shfrytëzuar plotësisht. Po hyjmë në një fazë vendimtare, ku do të testohet vullneti dhe aftësia e Shqipërisë për t’u përafruar me legjislacionin e BE-së. Komisioni është gati të mbështesë objektivin e Shqipërisë për anëtarësim deri në vitin 2027,” – theksoi Gonzato.

Ai nënvizoi se ritmi aktual i reformave duhet jo vetëm të ruhet, por edhe të përshpejtohet, pasi përmbushja e hapave konkretë është thelbësore për mbylljen e kapitujve të mbetur të negociatave.