Detaje të reja janë zbuluar nga vrasja e shqiptares Sadjide Muslija, 49 vjeçe, më 3 dhjetor në Ankona të Italisë nga bashkëshorti i saj, Nazif Muslija, i cili është në arrati.

Sipas mediave italiane, Sadjide Muslija u gjet e vrarë në shtratin e saj me shenja të rënda dhune. Ajo nuk ishte paraqitur në punë dhe pronari njoftoi autoritetet, të cilët kur shkuan në banesë, e gjetën trupin e saj në shtrat, me fytyrë të gjymtuar nga goditjet.

Sipas rindërtimit të ngjarjes, bashkëshorti i saj, Nazif Muslija është larguar me një mjet tip “Smart”, ndërsa telefoni i tij rezulton i fikur dhe i pakapshëm.

Hetimet kanë zbuluar se çifti kishte një të shkuar të rënduar nga dhuna në familje. Nazif Muslija ishte arrestuar më herët për dhunë ndaj bashkëshortes, madje edhe për kërcënime me sëpatë.

Në korrik ai kishte pranuar një dënim prej një viti e dhjetë muajsh, me kusht që të ndiqte një program rehabilitimi për burra të dhunshëm. Avokati i tij ka deklaruar se programi nuk kishte filluar ende për shkak të mungesës së vendeve, ndërsa Muslija kishte marrë vetëm disa seanca fillestare me një psikolog.

Mësohet gjithashtu se çifti ka një djalë 27-vjeçar që jeton në Zvicër, i cili e ka mësuar vrjasjen e nënës nga avokati i babait. “E prisja,” ka thënë 27-vjeçari pasi ka mësuar lajmin.

Ekspertët e Njësisë së Hetimeve Shkencore të Ankonës janë rikthyer në banesë për të gjetur gjurmë mikroskopike dhe mjetin e fortë që mund të jetë përdorur në krim. Disa objekte janë sekuestruar si prova të mundshme, ndërsa ende nuk është caktuar data e autopsisë.

Karabinierët vazhdojnë kërkimet intensive për gjetjen e Nazif Muslijës, i cili deri tani rezulton i arratisur.