Një mësuese e sapodalë në pension ka dërguar një apel në redaksinë e JOQ Albania, ku shpreh shqetësimin e saj për një fenomen që, sipas saj, po prek gjithnjë e më shumë sistemin arsimor në vend: përfshirjen e një pjese të mësuesve të shkollave publike në kurset private pas shkolle, ku japin mësim me pagesë të njëjtëve nxënës që kanë në klasë.

Sipas denoncimit të saj, ky zhvillim mund të krijojë konflikt interesi, pasi disa prej mësuesve mund të mos angazhohen mjaftueshëm gjatë orëve të mësimit në shkollë, duke bërë që nxënësit të ndihen të detyruar t’i ndjekin kurset private për të arritur të njëjtin nivel përgatitjeje.

Mësuesja në pension shprehet gjithashtu se ky fenomen po krijon pabarazi mes nxënësve, duke pretenduar se në disa raste fëmijët që ndjekin kurset pas shkollore marrin trajtim më të favorshëm, ndihmë shtesë apo edhe materiale paraprake, duke ndikuar drejtpërdrejt në rezultatet e tyre.

Në mesazhin e saj ajo shkruan:

“Arsimi po zhvlerësohet çdo ditë e më shumë. Nxënësit që shkojnë në kurset private marrin më shumë mbështetje dhe shpesh edhe informacione paraprakisht, duke krijuar një ndarje të padrejtë mes atyre që kanë mundësi të paguajnë dhe atyre që nuk kanë. Kjo ul figurën e mësuesit dhe dëmton besimin e prindërve.”

Ajo i bën thirrje shtetit që të ndërhyjë duke rishikuar orarin e punës së shkollave deri në orën 16:00 dhe duke rritur pagat e mësuesve, në mënyrë që nevoja për angazhime dytësore të reduktohet.

Në fund të apelit të saj, mësuesja paralajmëron se, sipas saj, nëse situata vazhdon kështu, dëmi që do t’i shkaktohet arsimit mund të jetë “i pakthyeshëm”.