Një hetues veteran në Australi thotë se mund të duhen vite për të kuptuar plotësisht çfarë ka ndodhur me fëmijën e vogël, mbetjet e të cilit u gjetën të varrosura në oborrin e një shtëpie në Brookfield, ku besohet se kanë qëndruar për më shumë se një dekadë.

Sipas 7NEWS, policia e shtetit të Viktorias ka kontaktuar autoritetet në Shqipëri dhe në vende të tjera të Evropës, pasi familja e djalit dyshohet se është me origjinë nga Kosova.

Masimiliano Balbiani, pronari aktual i shtëpisë, po punonte të hënën herët në mëngjes kur mori një telefonatë tronditëse nga policia, e cila i tha se dyshohej për praninë e një trupi njeriu të varrosur në oborrin e tij. Babai i tre fëmijëve u nis me urgjencë drejt shtëpisë, ende i tronditur nga lajmi.

Policia mbuloi dritaret me çadra blu dhe u kërkoi familjarëve të qëndronin brenda. Për orë të tëra, hetuesit kontrolluan oborrin duke përdorur pajisje të specializuara për depërtimin e tokës, derisa u fokusuan te një pjesë e gjelbërimit pranë një pllake betoni në derën e pasme. Aty, hetuesit gjetën mbetjet kockore të foshnjes që në kohën e groposjes dyshohet se ka qenë 18 muajsh.

Fëmija nuk ishte raportuar i zhdukur në kohën e vdekjes, ndërsa familja e tij dyshohet të ketë lënë Australinë pak pas ngjarjes. Familja që dyshohet të ketë origjinë shqiptare, qëndroi 6 muaj në shtëpinë ku u gjetën mbetjet kockore dhe papritur kohët e fundit ndaluan së paguari qiranë, shkatërruan shtëpinë dhe “ia mbathën”.

Hetimet vazhdojnë, ndërsa autoritetet thonë se zbardhja e plotë e këtij rasti të rëndë mund të kërkojë një kohë të gjatë.