Këshilli i Ministrave vendosi sot emërimin e Skënder Hitës në krye të Policisë së Shtetit, duke i besuar drejtimin e institucionit një prej figurave me përvojë në radhët e uniformave blu.

Deri në marrjen e këtij posti, Hita ishte në krye të Policisë së Fierit, ku ishte vlerësuar si një drejtues me eksperiencë të konsoliduar në strukturat e rendit dhe hetimit të krimit. Gjatë karrierës së tij, ai ka mbajtur një sërë funksionesh drejtuese në disa nga qarqet më të rëndësishme të vendit, duke u angazhuar drejtpërdrejt në çështje që lidhen me sigurinë publike dhe luftën kundër kriminalitetit.

Rrugëtimi i tij në poste drejtuese nisi në qarkun e Shkodrës, ku shërbeu si drejtor i hetimit të krimit. Më pas, ai mori drejtimin e Policisë në Durrës, një nga zonat më të ndjeshme në vend për shkak të pranisë së portit më të madh, intensitetit të lartë ekonomik dhe qarkullimit të madh të njerëzve dhe mallrave.

Gjatë kohës që drejtoi Policinë e Durrësit, u zbardhën disa ngjarje të rënda kriminale. Mes tyre përmendet edhe rasti i Indrit dhe Gentjan Beqiraj, dëshmitë e të cilëve ndihmuan autoritetet të hedhin dritë mbi një sërë ngjarjesh kriminale në Durrës, Tiranë dhe zona të tjera të vendit. Gjithashtu Hita zbardhi ngjarjen e rëndë që tronditi zonën e Shën Vlashit në Durrës ku fëmijët pas një konflikti vranë dhe groposën babain e tyre Pëllumb Metën.

Pas kësaj periudhe, Hita vijoi detyrën në krye të Policisë së Fierit, përpara se të emërohej sot në drejtimin e Policisë së Shtetit.