Një ngjarje e rëndë është regjistruar mesditën e kësaj të hëne mu në zemër të kryeqytetit, në zonën e Stacionit të Trenit në Tiranë.
Një sherr banal mes disa të rinjve, i cili kishte filluar në ambientet e një lokali dhe më pas vijoi në rrugë, mund të kishte përfunduar në një tragjedi.
Sipas asaj që dëshmitarët kanë treguar për JOQ Albania mësohet se disa të rinj ishin konfliktuar fillimisht në ambientet e një lokali aty pranë dhe më pas kishin dalë jashtë për t’u sqaruar.
Menjëherë në vendin e ngjarjes kishte mbërritur edhe Policia, ndërkohë që një nga të rinjtë e përfshirë në këtë konflikt tentoi t’i merrte pistoletën efektivit që ndërhyri për t’i ndarë duke tentuar që të qëllojë ndaj personave të tjerë të përfshirë në sherr.
Siç shihet dhe në pamjet e mëposhtme kanë qenë kalimtarët e rastit ata të cilët kanë ndërhyrë menjëherë dhe gjatë përleshjes mes të riut agresor dhe policit, arma ka “fluturuar” në anën tjetër të rrugës.
Deri më tani lidhur me këtë ngjarje nuk ka një njoftim zyrtar nga autoritetet, sakaq priten më tepër informacione për zbardhjen e plotë të saj.
