Duket se këmbësorët në vendin tonë nuk duan që të mësojnë nga fatkeqësitë e të tjerëve, por vazhdojnë që të rrezikojnë jetën e tyre duke kaluar në mënyrë të papërgjegjshme rrugën.

Së fundmi një denoncim shqetësues ka mbërritur në redaksinë tonë, ku shihet një burë që qëndron sipër bordurës që ndan autostradën Tiranë-Durrës, në afërsi të QTU-së. Ai ka kaluar njërën anë të rrugës, dhe duket teksa pret mundësinë që autostrada të ketë më pak makina, që të kalojë dhe pjesën tjetër.

Papërgjegjshmëria duket në nivele të frikshme. Edhe sa aksidente duhet të ndodhin që shqiptarët t’i thërrasin mendjes dhe të kujdesen më shumë për jetën e tyre?

Kujtojmë se dy ditë më parë, në Kamëz, një makinë përplasi dy vajza të reja që ishin duke kaluar rrugën. Sipas raportimit të ngjarjes, vendi ku ndodhi aksidenti ka mungesë sinalistike rrugore, dhe shoferët nuk rrespektojnë shpejtësinë e lejuar.

Ditën e djeshme, në zonën e Astirit, një automjet përplasi një këmbësor që po kalonte rrugën nga bordura.

Raste të tilla sa vijnë dhe shtohen, prandaj thirrja shkon për këmbësorët që të tregojnë më shumë kujdes për mënyrën se si zgjedhin që ta kalojnë rrugën.