Një ngjarje tragjike ka tronditur qytetin Khan Younis në Rripin e Gazës, ku një sulm ajror izraelit goditi banesën e një mjekeje lokale, duke i marrë jetën nëntë nga dhjetë fëmijët e saj, njoftoi Spitali Nasser, ku ajo punon.

Sipas mjekëve, vetëm një nga fëmijët, bashkë me të atin, mbijetuan, megjithëse të plagosur rëndë. Djali 11-vjeçar i Dr. Alaa al-Najjar iu nënshtrua një ndërhyrjeje kirurgjikale nga kirurgu britanik Graeme Groom, që ndodhet si vullnetar në spitalin Nasser.

Pamje të verifikuara nga BBC tregojnë skena të dhimbshme, ndërsa trupat e pajetë të fëmijëve nxirreshin nga rrënojat. Ministria e Shëndetësisë në Gaza, e drejtuar nga Hamasi, tha se shtëpia u godit pak pasi babai, Hamdi al-Najjar, ishte kthyer në banesë, pasi kishte shoqëruar gruan në punë.

“Fëmija më i madh ishte vetëm 12 vjeç,” – deklaroi Dr. Muneer Alboursh, drejtori i Ministrisë së Shëndetësisë.

Zëdhënësi i Mbrojtjes Civile, Mahmoud Basal, konfirmoi se fillimisht u nxorën tetë trupa nga rrënojat, por më pas numri i viktimave u përditësua në nëntë fëmijë të vrarë.

Në një deklaratë të përgjithshme, Forcat Mbrojtëse të Izraelit (IDF) njoftuan se kishin goditur mbi 100 objektiva në Gaza brenda 24 orëve të fundit. Sakaq, Ministria e Shëndetësisë raportoi se të paktën 74 persona janë vrarë në këtë periudhë.

Dr. Youssef Abu al-Rish, mjek në të njëjtin spital, tha se gjeti Dr. Alaa al-Najjar në sallën e operacionit, në pritje për të marrë lajme për gjendjen e djalit të saj, të vetmit nga fëmijët që i mbijetoi sulmit.

Në një deklaratë të dhimbshme, një i afërm i familjes, Youssef al-Najjar, tha:

“Mjaft! Kini mëshirë për ne! Jemi të rraskapitur nga zhvendosja dhe uria!”