Një ngjarje e rëndë është shënuar në Tiranë, ku një shtetas italian ka humbur jetën pas një ndërhyrjeje dentare.
Viktima është 63-vjeçari D. S., me banim të përkohshëm në kryeqytet, i cili kishte kryer një ndërhyrje kirurgjikale më datë 20 maj 2025 në një klinikë dentare në zonën e “Rrugës së Kosovarëve”.
Sipas njoftimit zyrtar të Policisë, më datë 22 maj, ai është paraqitur në një spital për shkak të përkeqësimit të gjendjes shëndetësore, por fatkeqësisht nuk ka mundur të mbijetojë dhe ka ndërruar jetë mëngjesin e sotëm.
Autoritetet shqiptare kanë nisur hetimet për rastin. Specialistët për Hetimin e Krimit në Komisariatin Nr. 2 kanë marrë në pyetje dentistin dhe administratorin e klinikës ku u krye ndërhyrja.
Materialet janë referuar në Prokurori për vlerësim të mëtejshëm.
