Sali Berisha në konferencën për media, ka deklaruar se mungojnë 60 mijë vota të diasporës, ndërsa pretendon se ato fletë votimi janë përdorur në Shqipëri.

Kreu demokrat, i cili thotë se nuk do të pranojë rezultatin e zgjedhjeve, deklaron se procesin e 11 majit, do të zbërthejnë një më një, me provat dhe dokumentet që disponojnë.

Ndër të tjera ai e cilësoi procesin e zgjedhjeve të 11 majit, më të turpshmin ndonjëherë.

Berisha: Janë dërguar nën drejtimin e Taulant Ballës dhe Belinda Ballukut patronazhistë që kanë mbushur zarfet në vende të caktuara, në Greqi dhe Itali. Janë kontraktuar ish-punonjës dhe punonjës të ambasadave, ish-zyrtarë të PS-së për të grumbulluar zarfet dhe për t’i paraqitur si duhet për të bërë këtë që kanë bërë.

Mos harroni se mungojnë 60 mijë vota. Ku janë? Fletët janë përdorur brenda vendit. Ne do ta zbërthejmë këtë proces një më një. Është procesi më i turpshëm dhe është farsa më e turpshme dhe askush s’mund të kalojë mbi të.