Një qytetare nga Vlora ka denoncuar gjendjen shqetësuese të varrezave publike të qytetit, të cilat ndodhen në një nivel të ulët mirëmbajtjeje, pavarësisht përkujdesjes së vazhdueshme nga familjarët.
Sipas saj, varret pastrohen dhe sistemohen rregullisht nga qytetaret, por sa herë kthehen, i gjejnë të ndotura, të mbuluara nga barishtet dhe mbeturinat.
Ajo shpreh revoltën ndaj mungesës së përgjegjësisë nga ana e autoriteteve lokale që, sipas saj, nuk ndërhyjnë për mirëmbajtjen dhe ruajtjen e dinjitetit të hapësirave të të ndjerëve.
“Ne bëjmë pjesën tonë, por nuk ka asnjë kontroll, asnjë pastrim. Është turp që në një qytet si Vlora, varrezat të jenë në këtë gjendje”, thotë ajo.
Qytetarët kërkojnë që Bashkia e Vlorës të marrë masa urgjente për pastrimin dhe mirëmbajtjen e varrezave, si dhe për vendosjen e një administrimi të rregullt që të garantojë respektin për të ndjerët dhe për familjet që i vizitojnë.
