“Qante i shkreti, lutej” – Rrëfim i rëndë për ngjarjen e errët. Dhe për trupin që hodhën në rezervuar. Anëtari i bandës së Laert Haxhiut tregon detaje të rënda nga vrasja e Fridman Xhaferrajt: E lidhëm me gurë që të fundosej në ujë

Artan Tafani, i penduari i drejtësisë dhe anëtar i grupit kriminal të Laert Haxhiut, ka rrëfyer para gjykatës detaje të rënda dhe tronditëse nga ekzekutimi makabër i Fridman Xhaferrajt, ngjarje e ndodhur në rrethana të ftohta dhe të llogaritura deri në detaje.

Në dëshminë e tij, Tafani tha se gjithçka nisi pas një telefonate që Laert Haxhiu mori nga Ligori, i cili i tha se Klisman Xhaferri kishte komunikuar në telefon për “punë malli”. Pavarësisht se ndodheshin në një hotel, Laerti kishte dhënë urdhrin: “Çohu, do ikim në Korçë ta vrasim”.

Në vijim, Tafani tregoi se ai, Laerti dhe Lulzimi nisën rrugën drejt Korçës. Lulzimi mori një armë zjarri nga një garazh ku banda mbante arsenalin dhe një makinë me portobagazh për transportin e trupit. Në Pogradec, grupi u bashkua me Bledar Berberin dhe Mariglen Topuzin, të cilët u morën në makinë dhe vijuan udhëtimin së bashku.

Sipas dëshmisë, gjatë rrugës për në Tepelenë, ku planifikohej të fshihej trupi i viktimës, grupi diskutonte për vendin ku do ta hidhnin. Ata panë një rezervuar dhe vendosën që aty do ta fundosin trupin. Në këtë udhëtim, bisedat mes tyre përshkruheshin edhe nga momente cinike dhe të ftohta. Tafani kujtoi një moment kur Marigleni i tha Laertit: “O lala, ma le ta bëj unë, të mësoj dorën”.

Artan Tafani tregoi se gjatë aktit të ekzekutimit ndodhej në një gjendje të mpirë, por gjithçka ishte bërë me dije paraprakisht dhe se Bledari kishte dijeni të plotë për veprimet. Ai theksoi se viktima, Fridman Xhaferraj, qante dhe lutej për jetën e tij, para se të lidhej me gurë dhe të mbytej në rezervuar, për t’u zhdukur pa lënë gjurmë.

Dëshmia e Tafanit hedh dritë mbi një vrasje të kryer me egërsi, organizim kriminal dhe pa asnjë mëshirë, duke nxjerrë në pah anën më të errët të grupit të Laert Haxhiut dhe mënyrën sesi funksiononte zinxhiri i vendimeve brenda këtij grupi famëkeq.

DËSHMIA E PLOTË E TAFANIT

“Për vrasjen e Çajup Selimit unë mora 25 mijë euro, është bërë pas një jave. Ditën tjetër pas vrasjes në Tepelenë, në darkë kemi vrarë Firdman Xhaferrin.

Ligori i thotë Lulzimit merr litarin dhe armët dhe do ikim në Korçë për të vrarë Fridman Xhaferrin.

Arsyeja ishte se fliste në numër në telefon për çështje droge. Lulzimi mori pistoletë “TT” me dy fishekë. Merr edhe një “Ford Focus” (makinë) me portobagazh.

Unë, Laerti dhe Lulzimi jemi nisur për në Korçë. Para Korçës kemi ndaluar në Pogradec. Në ato zona takojmë Bledar Berberin dhe Mariglen Topuzin.

Këta i mori me vete me qëllim për të marre trupin e Fridmanit për ta hedhur.

Marigleni i thotë Laertit “O lala, ma le mua këtë të mësoj dorën” me qëllim për ta vrarë.

Fridman Xhaferri ishte nga Lushnja, ishte përdorues.”