Një ngjarje e rëndë me pasojë vdekjen e katër personave ka tronditur qytetin e Malagas në Spanjë, pas një tentative grabitjeje që përfundoi në një aksident tragjik.

Tre shtetas shqiptarë, të dyshuar si pjesëtarë të një bande kriminale, humbën jetën së bashku me një nën-inspektor të Policisë Kombëtare Spanjolle pas një përplasjeje “kokë më kokë” në autostradën A-7.

Ngjarja nisi në lagjen Puerto de la Torre, ku tre persona tentuan të grabisin një farmaci në rrugën Lope de Rueda. Grabitja dështoi dhe autorët u larguan me shpejtësi në një automjet të fuqishëm, ndërsa forcat e policisë kombëtare dhe vendore u vunë në ndjekje.

Sipas burimeve zyrtare nga agjencia EFE, në përpjekje për t’i shpëtuar ndjekjes, grabitësit morën një kthesë të gabuar dhe përfunduan duke udhëtuar në kah të kundërt në autostradë.

Pikërisht aty ndodhi përplasja fatale me makinën e një oficeri policie 48-vjeçar, i cili nuk ishte pjesë e operacionit, por po kthehej në shtëpi pas një turni nate.

Përplasja e fuqishme shkaktoi shpërthimin në flakë të dy automjeteve. Zjarrfikësit nga stacionet Churriana, Carretera de Cádiz dhe Martiricos ndërhynë me urgjencë për të nxjerrë trupat nga automjetet e djegura.

Fatkeqësisht, tre shqiptarët në njërin prej mjeteve u gjetën pa shenja jete, ndërsa edhe përpjekjet për të shpëtuar nën-inspektorin rezultuan të pasuksesshme.

Autoritetet lokale kanë nisur hetimet për zbardhjen e plotë të rrethanave të ngjarjes, të cilat po drejtohen nga Departamenti i Trafikut i Gardës Civile.