Pamje të tensionuara janë regjistruar sonte në stadiumin “Air Albania”, gjatë ndeshjes Shqipëri–Serbi, ku një tifoz është larguar me forcë nga efektivët e policisë për shkak të një bluze me logon e UÇK-së.

Ngjarja ka ndodhur në tribunat e stadiumit, ku forcat e rendit ndërhynë për të larguar tifozin, ndërkohë që nga pamjet filmike duket qartë se ai nuk ka bërë rezistencë, por gjithsesi u shoqërua me forcë jashtë.

Sipas informacioneve, çdo simbol që përmbante referenca për UÇK-në, përfshirë bluza dhe flamuj, është ndaluar të mbahet brenda stadiumit, dhe janë konfiskuar nga autoritetet që në hyrje.

Ky veprim ka ngjallur reagime të ndryshme në rrjetet sociale, ndërsa nuk ka ende një deklaratë zyrtare nga Policia e Shtetit apo organizatorët e ndeshjes për arsyet e ndërhyrjes së tillë.

Ngjarja vjen në një atmosferë të ngarkuar përballjesh sportive me sfond politik, ku përfshirja e simboleve historike konsiderohet shpesh provokuese apo e ndjeshme në arenën ndërkombëtare.