Një adoleshente shqiptare vetëm 15 vjeç, e shtruar aktualisht në shërbimin e psikiatrisë, po lufton për jetën pas një përvoje të dhimbshme me anoreksinë nervore. Nën presionin për të qenë “si modelet” që shfaqen në rrjetet sociale, ajo arriti të përdorte 80 tableta laksative për të përjashtuar çdo gjurmë ushqimi nga trupi i saj – edhe pse dita e saj kalonte me një domate të vetme.

“Është në limitet e peshës dhe shumë e informuar për çdo kalori që konsumon,” tregon psikiatrja Valbona Alikaj, e cila po ndjek trajtimin e saj. “Është vajzë shumë e zgjuar, ekselente në shkollë, por shumë e ndikuar nga idealet e bukurisë që shfaqen në rrjetet sociale.”

Përtej aspektit shëndetësor, rasti hedh dritë mbi një problem më të thellë: qasja e lirë në medikamente të rrezikshme si laksativët dhe ndikimi i modeleve jo-realiste të trupit mbi të rinjtë. Si është e mundur që një 15-vjeçare të blejë pa asnjë kontroll dhjetëra tableta në farmaci të ndryshme?

Mjekja bën thirrje të fortë për prindërit: “Tregoni kujdes me çfarë përmbajtjesh përballen fëmijët tuaj online. Modelet koreane dhe standardet jo-realiste të bukurisë që promovohen në rrjete sociale po kthehen në kërcënim për shëndetin mendor dhe fizik të adoleshentëve.”

Rasti i vajzës 15-vjeçare nuk është i vetmi. Numri i vajzave që përballen me çrregullime të të ngrënit është në rritje. Ajo çfarë nisi si një dëshirë për të qenë “në modë”, u kthye në një betejë për jetë. Sot, ajo është simbol i një brezi që ndodhet mes dy botëve: realitetit dhe idealit të krijuar në ekranin e telefonit.