Një ngjarje tronditëse ka ndodhur më 24 qershor në qytetin Areia Branca, në shtetin Sergipe të Brazilit, ku një vajzë vetëm 23 muajshe humbi jetën pasi një drejtues mjeti hapi zjarr ndaj makinës së familjes së saj.

Autori, 28-vjeçari Alex de Oliveira Nunes, i cili drejtonte një kamionçinë, kishte ndaluar për t’i hapur rrugë një makine të vogël familjare, por u irritua pasi ajo ia bëri me drita dhe i ra borisë për të kaluar.

Sipas pamjeve të sigurisë, Nunes fillon ta ndjekë nga pas makinën me agresivitet, derisa papritur nga dritarja e makinës së tij del një dorë që mban një armë zjarri dhe qëllon dy herë.

Një prej plumbave godet në kokë vogëlushen Layla Sofia Santos Menezes, e cila humbi jetën menjëherë. Familja ndodhej vetëm 100 metra larg shtëpisë kur ndodhi tragjedia.

Nëna e saj, Valéria dos Santos, deklaroi për mediat lokale: “U ndalëm pranë një kishe, dola me të në krahë duke kërkuar ndihmë. Ajo vetëm sa po jepte shpirt.”

Autori u arratis nga vendngjarja, por u arrestua disa orë më vonë në banesën e tij. Ai pranoi para policisë se kishte qenë nën ndikimin e alkoolit dhe se kishte qëlluar vetëm për të “frikësuar” shoferin tjetër.

Nunes nuk zotëronte as leje drejtimi dhe as leje për armëmbajtje. Ai ka pohuar gjithashtu se armën e kishte blerë dy vite më parë nga një tjetër shofer kamioni.

Foshnja u varros më 25 qershor në Itabaiana. Nunes ndodhet aktualisht në paraburgim, ndërsa hetimet për ngjarjen vijojnë.