Një ngjarje e rëndë është raportuar sot në fshatin Shtikë të Kolonjës, ku është gjetur trupi i dekompozuar i një personi, pranë stacionit elektrik të zonës.

Sipas informacioneve paraprake, dyshohet se viktima është mashkull, por për shkak të gjendjes së rënduar të trupit, identiteti nuk është konfirmuar ende.

Burime nga policia bëjnë me dije se nga këqyrja e parë e trupit, nuk janë konstatuar shenja dhune apo dëmtime që mund të jenë shkaktuar nga faktorë të jashtëm. Dyshohet se trupi ka qëndruar për rreth 6 muaj në vendin ku është gjetur, çka e ka bërë të vështirë edhe identifikimin.

Ngjarja është regjistruar rreth orës 15:00, dhe aktualisht grupi hetimor ndodhet në vendngjarje, duke punuar për të sqaruar shkaqet e vdekjes, për identifikimin e viktimës, si dhe për zbardhjen e plotë të rrethanave të kësaj ngjarjeje misterioze.

Autoritetet kanë nisur hetimet dhe pritet që pas analizave mjeko-ligjore të jepen më shumë detaje mbi identitetin dhe shkakun e vdekjes.