Prej së dielës, një valë e të nxehtit ka përfshirë disa rajone të Greqisë, me temperatura që parashikohet të tejkalojnë 40 gradë Celsius deri të enjten. Si përgjigje, autoritetet kanë urdhëruar ndërprerje të detyrueshme të punës në orët më të nxehta të ditës në zonat më të prekura. Ministria e Punës ka ndaluar kryerjen e aktiviteteve fizike në ambiente të hapura dhe shpërndarjen e ushqimeve nga ora 12:00 deri në 17:00, duke kërkuar gjithashtu që punëdhënësit të ofrojnë mundësi për punë në distancë aty ku është e mundur.

Masat do të zbatohen kryesisht në pjesën qendrore të vendit dhe në disa ishuj, ku temperaturat pritet të arrijnë nivele më të larta, ndërsa në Athinë nuk është ndërmarrë ndonjë hap i jashtëzakonshëm, pasi situata konsiderohet brenda normales sezonale. Sipas meteorologëve, ditët më të nxehta do të jenë e marta dhe e mërkura, ndërsa nga fundjava pritet një rënie e lehtë e temperaturave në rreth 35 gradë Celsius. Sipas REL, në zonat bregdetare dhe ishuj, nxehtësia do të jetë më e butë, me rreth 3-5 gradë më pak sesa në zonat e brendshme të vendit.

Për të mbrojtur shëndetin e qytetarëve, autoritetet kanë bërë thirrje për kujdes të shtuar, duke rekomanduar shmangien e ekspozimit në diell gjatë mesditës, hidratim të shpeshtë, konsum ushqimesh të lehta dhe shmangie të aktiviteteve fizike në natyrë. Komunat në disa qytete kanë hapur ambiente me ajër të kondicionuar për të strehuar personat më të rrezikuar, si të pastrehët apo ata pa kushte për freskim. Nxehtësia ekstreme është përhapur edhe në pjesë të tjera të Evropës dhe rajonin e Ballkanit, duke shtuar shqetësimet për ndikimin në shëndet dhe ekonomi.