Një shqiptar nga Kosova, shofer autobusi i një firme që operon në linjat Kosovë–Shqipëri, ka dërguar një denoncim të fortë në redaksinë e JOQ Albania lidhur me trajtimin që, sipas tij, i bëhet nga Policia Rrugore në vendin tonë.

Ai shprehet se brenda vetëm 20 minutash është ndaluar dy herë dhe është gjobitur në mënyrë absurde, ndërsa thekson se këto veprime po ndikojnë drejtpërdrejt në largimin e turistëve kosovarë nga Shqipëria.

Sipas denoncuesit, gjoba e parë prej 3000 lekësh (rreth 30 euro) i është vendosur me pretendimin se është futur në një karburant duke kaluar një vijë të pandërprerë, megjithëse ai thekson se kjo ishte e vetmja mënyrë për të hyrë në karburant dhe se në raste të tilla, nëse shkelja do ishte aq e rëndë, do duhej të pezullohej patenta.

Në gjobën e dytë, të lëshuar vetëm 20 minuta më vonë nga një tjetër patrullë, thuhet se është shkelur kohëzgjatja maksimale e drejtimit të mjetit për një orar të caktuar.

Shoferi thotë se i kërkoi policit të dytë një zbutje të gjobës për shkak të rrethanave, por iu tha se “nuk kemi nen ligjor për të ulur gjobën”, ndërkohë që për rastin e parë i ishte aplikuar pikërisht një nen që, sipas policisë, e lejonte këtë.

“Jemi një kompani që punon në linjat Kosovë-Shqipëri. Vetëm sot mora dy gjoba për 20 minuta pa të drejtë. Po të kalosh në vijë të plotë për të hyrë në karburant, të gjobisin. Po të mos marrësh pasagjer në Cassà Italia, s’ke të drejtë. Po të ndalosh në Pati Travel, s’ke të drejtë. Në Rinas s’ke drejtë as të marrësh, as të zbritësh njeri. Po kështu si do punojmë ne?”, shkruan ai.

Sipas tij, shumë shqiptarë të Kosovës kanë nisur të heqin dorë nga pushimet në Shqipëri për shkak të trajtimit të padrejtë që u bëhet në kufi, rrugë dhe në qytete, ku ndalohen për çdo gjë dhe gjobiten pa asnjë mirëkuptim. “

Vetëdijësimi ka nisur. Këtë vit janë 60% më pak turistë nga Kosova që zgjedhin detin shqiptar. Dhe ne si kompani kemi nisur t’i sugjerojmë klientëve oferta në shtete të tjera. Nuk kemi rrugë tjetër,” përfundon denoncimi.

Në fotot e dërguar, qytetari ka bashkangjitur të dy gjobat e marra, me shkeljet e cituara dhe arsyetimet përkatëse, që sipas tij nuk qëndrojnë në asnjë bazë reale.