Kuvendi i Shqipërisë ka miratuar në parim projektligjin “Për barazinë gjinore”, me 77 vota pro, 36 kundër dhe asnjë abstenim. Një ligj që, sipas mbështetësve të tij, vjen për “të hequr paragjykimet gjinore”, por që për shumë qytetarë, duket më shumë si një hap për të hequr logjikën nga ligjet.

Jashtë Parlamentit, dhjetëra qytetarë, prindër, aktivistë dhe përfaqësues fetarë protestuan me pankarta ku shkruhej:

“Ka vetëm dy gjini, mashkull dhe femër”, “Mos prekni fëmijët”, “Jo ligjit anti-familje”.

Protestuesit paralajmëruan se kjo është vetëm faza e parë e kundërshtimit të një ligji që, sipas tyre, rrezikon familjen tradicionale dhe vlerat shqiptare.

Nga ana tjetër, mazhoranca dhe kryeministri Edi Rama e mbrojtën projektligjin si “në përputhje me standardet europiane”. Në përkthim të lirë, kjo do të thotë se Evropa po na mëson të mos e dimë më kush jemi.

Ligji, që teorikisht synon “barazinë e burrave dhe grave”, përfshin formulime që hapin rrugë për vetëpërcaktimin e gjinisë, një nocion që për shumë shqiptarë tingëllon si diçka mes dokumentarit të Netflix-it dhe një fletëvotimi ku mund të zgjedhësh të jesh “kapuçino” në mëngjes dhe “banane” pasdite.

Në fund të ditës, askush nuk e di saktësisht se çfarë do të ndryshojë në praktikë, por një gjë është e sigurt: me këtë ligj, Shqipëria ka hyrë zyrtarisht në epokën ku gjinia është si Wi-Fi: secili ka të vetën, dhe mund ta ndryshojë kur t’i dojë qejfi.

Ndërkohë, organizatat konservatore dhe Koalicioni “Pro Familjes & Jetës” e kanë konsideruar këtë ligj si “një përpjekje për të zhbërë themelet biologjike e shoqërore të kombit shqiptar”.