Një ngjarje e rëndë ka tronditur rajonin e Viotias në Greqi, ku policia ka gjetur një trup të djegur brenda një automjeti, në zonën Skourta, dhe dyshimet e para flasin se viktima mund të jetë një shtetas shqiptar.

Sipas mediave greke, dyshohet se trupi i përket 27-vjeçarit Sulo Halili, me origjinë nga Tepelena, i cili rezulton i zhdukur që nga pasditja e 4 nëntorit. Halili ishte larguar nga banesa e tij në Halkida dhe prej asaj kohe nuk kishte dhënë më asnjë shenjë jete. Automjeti i tij personal u gjet i braktisur pak ditë më vonë në zonën e Vilias, afër Athinës.

Përshkrimi i 27-vjeçarit përputhet me viktimën e gjetur: rreth 1.70 metra i gjatë, flokë dhe sy kafe, mjekër dhe një tatuazh me dy trëndafila, një yll dhe disa shkronja në krahun e majtë. Ditën e zhdukjes, ai kishte veshur këmishë të zezë, pantallona xhins të zeza Cargo dhe atlete të bardha.

Sipas të dhënave të para nga autopsia, viktima është qëlluar me armë zjarri përpara se të digjej. Trupi është gjetur i prangosur në sediljen e pasme të një makine të vjedhur në Glifadha, me targa të falsifikuara që i përkisnin një automjeti tjetër në Katerini.

Autoritetet greke po hetojnë pistat e hakmarrjes apo të një larje hesapesh në kuadër të veprimtarive kriminale, por nuk përjashtohet as mundësia që 27-vjeçari të ketë qenë thjesht viktimë e një konflikti të gabuar.

Rezultatet e analizës së ADN-së pritet të dalin në ditët në vijim dhe do të konfirmojnë zyrtarisht nëse trupi i djegur i përket vërtet Sulo Halilit.