Pas ditëve me reshje, më në fund moti në Shqipëri stabilizohet. Në 24 orët e ardhshme pritet kthjellim në të gjithë territorin, me vranësira të lehta dhe kalimtare vetëm në qendër dhe jug gjatë orëve të para të ditës.

Temperaturat do të zbresin ndjeshëm në mëngjes, duke shënuar minimumet 3–6°C në zonat malore, ndërsa përgjatë vijës bregdetare pritet të mos zbresin nën 13°C. Në mesditë, termometri do të rritet me rreth 2 gradë, duke arritur maksimumin prej 22°C në zonat perëndimore.

Era do të fryjë kryesisht nga verilindja, e lehtë deri mesatare.

Paraditja e nesërme do të jetë me diell pothuajse në të gjithë vendin, ndërsa vranësirat e lehta do të zhvendosen drejt juglindjes në orët e mesditës.

Për pesë ditët në vijim parashikohet mot i qëndrueshëm, me diell dhe pa reshje deri të paktën në fillim të javës tjetër.

Nga e enjtja temperaturat do të rriten gradualisht, me minimumet që pritet të arrijnë në 5–6°C dhe maksimumet deri në 24–25°C.

Në Ballkan, situata do të jetë pothuajse e ngjashme: kthjellime dhe vranësira të herëpashershme, pa reshje. Temperatura mesatare e ditës nesër do të luhatet nga 15°C në veri deri në 25°C në jug. Ndërkohë, reshjet do të mbeten të fokusuara kryesisht në brigjet turke të Detit të Zi, ndërsa pjesa tjetër e rajonit do të gëzojë ditë të qeta dhe me diell.

Në nivel evropian, një sistem frontal me reshje do të përfshijë brigjet perëndimore – nga Portugalia deri në Norvegji – ndërsa Mesdheu dhe Europa Qendrore do të mbeten me mot të kthjellët dhe temperatura të larta për këtë periudhë të vitit.

Pas një periudhe me luhatje, Shqipëria dhe rajoni më në fund do të shijojnë disa ditë të plota me diell, ideale për udhëtime dhe aktivitete në natyrë