Një analizë e re e ADN-së së Adolf Hitlerit ka nxjerrë në dritë informacione të papritura mbi jetën dhe prejardhjen e diktatorit gjerman. Sipas dokumentarit të ri televiziv “ADN-ja e Hitlerit: Plani i një diktatori”, i cili do të shfaqet premierë të shtunën në mbrëmje në Britaninë e Madhe, studiuesit zbuluan se Hitleri kishte disa çrregullime gjenetike dhe se nuk kishte prejardhje hebraike, siç është spekuluar shpesh.

Ekipi i gjenetistëve përdori një mostër pëlhure me njolla gjaku të marrë nga divani ku Hitleri kreu vetëvrasjen. ADN-ja u konfirmua duke krahasuar materialin gjenetik me ADN-në e një prej të afërmve të tij, duke siguruar kështu autenticitetin e mostrës.

Analiza zbuloi se Hitleri vuante nga sindroma Kallmann, një çrregullim gjenetik i lidhur me pubertetin jo të plotë dhe, sipas studiuesve, mund të ketë ndikuar tek karakteristikat seksuale. Përveç kësaj, ADN-ja tregoi prani të gjeneve që mund të rrisin prirjen për autizëm, skizofreni dhe çrregullim bipolar, megjithëse ekspertët theksuan se një diagnozë e saktë nuk mund të bëhet vetëm nga analiza gjenetike.

Psikologu britanik Simon Baron-Cohen, i cituar në dokumentar, shpjegoi:

“Sjellja nuk është kurrë 100% gjenetike. Lidhja e mizorisë së Hitlerit me këto diagnoza rrezikon stigmatizimin e njerëzve që jetojnë me këto kushte, të cilët shumica nuk janë as dhunshëm, as mizorë.”

Një nga aspektet më të diskutueshme të dokumentarit është konfirmimi i prejardhjes së Hitlerit. Thashethemet për një sfond hebre shpesh kanë qarkulluar gjatë jetës së tij, përfshirë edhe pretendime të fundit nga zyrtarë të huaj si Ministri i Jashtëm rus Sergei Lavrov në vitin 2022. Analiza e ADN-së së diktatorit tregon qartë se Hitleri kishte prejardhje austriake-gjermane, duke hedhur poshtë teoritë për lidhje hebraike.

Ky dokumentar, duke kombinuar gjenetikën me historinë, ofron një vështrim të thellë mbi figurën e njohur për mizoritë e saj ekstreme.