Koncesioni i hemodializës, një nga kontratat më të kritikuara të shëndetësisë shqiptare, shpërthen sërish në skandal. Kontrolli i Lartë i Shtetit ka zbuluar shkelje flagrante, abuzime financiare dhe pagesa të dyfishta të kryera në qendrat e administruara nga kompania “Dia Vita”, në pronësi të biznesmenit Klodian Allajbeu.

Sipas auditimit zyrtar, shteti ka paguar për seanca dialize që nuk janë kryer kurrë, duke i futur në xhep kompanisë para publike pa asnjë shërbim të ofruar.

Pagesa për pacientë që s’kishin marrë më shërbimin aty
Një rast i zbuluar nga KLSH është tronditës: — Një pacient kishte ndryshuar qendrën e hemodializës dhe trajtohej në një spital tjetër të kontraktuar me Fondin. — Ndërkohë, Fondi vijonte të paguante edhe qendrën e Lezhës të koncesionarit, ku pacienti nuk ishte paraqitur më.

Kjo, sipas KLSH, ndodh sepse kompania ka raportuar seanca të bazuara jo te shërbimet reale, por te “projektime”, një manovër që i ka sjellë kompanisë të ardhura ekstra nga paratë e taksapaguesve.

Shërbime të cungura, mungesë mjekësh dhe refuzim i urgjencave
Auditimi ekspozon edhe më tej mangësi serioze:

Mungesë mjekësh nefrologë me kohë të plotë, ndonëse ky shërbim është jetik për pacientët me sëmundje renale.

Mungesë dietologësh, që janë thelbësorë për regjimin ushqimor të pacientëve në dializë.

Refuzim të pacientëve me insuficiencë akute renale, të cilët dërgohen në QSUT edhe në rastet e emergjencave, duke shtuar rrezik dhe sorollatje.

Pra, ndërsa shteti paguan si për shërbim të standardeve të larta, në terren pacientët marrin trajtim të cunguar dhe jo sipas kontratës.

Investime që duhej të ishin bërë, por s’kanë filluar fare
Koncesioni me vlerë fillestare 86 milionë dollarë parashikonte që në katër vitet e fundit të kontratës, kompania e Allajbeut të investonte për aparatura të reja të hemodializës, të cilat më pas i kalojnë spitaleve publike.

Sipas KLSH, ky investim “nuk ka nisur fare”, edhe pse kontrata mbyllet në mars 2026.

Pra, jo vetëm janë marrë para për shërbime të paplota apo të pakryer, por as detyrimet investuese të kontratës nuk janë përmbushur.

Koncesion pa kontroll, pa transparencë, pa llogari
Auditimi i KLSH thekson se për vite me radhë qendrat e hemodializës të koncesionarit nuk janë monitoruar:

As për cilësinë e shërbimit,

As për kostot,

As për eficensën.

Ndërsa jemi vetëm pak muaj larg përfundimit të kontratës, ende nuk ekziston një raport zyrtar që tregon nëse ky koncesion ka qenë ekonomikisht i justifikuar apo një tjetër faturë e rëndë që e ka paguar publiku.