Një 37-vjeçar, Fabjel Toska (Xhindi), është plagosur me armë zjarri mëngjesin e sotëm në hyrje të qytetit të Beratit, në zonën e njohur si “Dogana”. Ngjarja ka ndodhur pas një sherri që nis për një parakalim mjetesh.

Sipas burimeve policore, i plagosuri ka qenë duke udhëtuar me një mjet tip Seat së bashku me një shok, në aksin Kombinat-Dimal.

Një mjet tjetër, një fuoristradë me ngjyrë të zezë, e ka ndjekur dhe parakaluar disa herë makinën e të plagosurit. Fabjel Toska ka dalë nga makina për t’u sqaruar me shoferin e mjetit tjetër, por ai e ka qëlluar me një plumb në bark. Shoku i të plagosurit ka dalë gjithashtu, por sapo ka parë sulmin është larguar dhe ka njoftuar policinë.

Burimet konfirmojnë se viktima dhe shoferi i mjetit tjetër nuk kanë pasur njohje të mëparshme mes tyre, një fakt që është konfirmuar edhe gjatë deklaratave përpara inspektorëve të krimeve në DVP Berat.

Fabjel Toska, banues në lagjen “Çlirim”, është transportuar fillimisht në Spitalin Rajonal Berat dhe më pas në Spitalin e Traumës, ku ndodhet në gjendje të rëndë.

Grupi hetimor, nën drejtimin e Prokurorisë, vijon punën intensive për zbardhjen e rrethanave të ngjarjes, sigurimin e provave dhe identifikimin e autorit/ve.