Shtatë persona humbën jetën dhe 11 të tjerë u plagosën të shtunën në jug të Turqisë, kur një autobus ndërqytetas u përplas me një kamion në një autostradë.
Sipas zyrës së guvernatorit lokal, aksidenti ndodhi në rrugën që lidh qytetet Adana dhe Gaziantep, kur autobusi goditi një kamion me rimorkio që kishte ndaluar për shkak të një gome të çarë, raporton agjencia shtetërore Anadolu.
Pamjet nga vendngjarja tregojnë se përplasja ka qenë e fortë, me pjesën e përparme të djathtë të autobusit të shkatërruar plotësisht pas goditjes me pjesën e pasme të kamionit.
Pas aksidentit, në vendngjarje mbërritën ekipet e shpëtimit, zjarrfikësit dhe ambulancat. Të plagosurit morën ndihmën e parë në vend dhe më pas u transportuan në spitale të ndryshme në Osmaniye, ku po marrin trajtim mjekësor.
Drejtuesi i kamionit, i cili mbijetoi, është vënë në pranga, ndërsa policia ka mbyllur rrugën përkohësisht për të kryer hetimet.
