Shtatë persona janë arrestuar gjatë aksionit policor të zhvilluar në rajonin e Prishtinës me urdhër të Prokurorisë Speciale të Kosovës.

Operacioni me masa të fshehta e me ekipe në terren ka nisur që nga orët e hershme të mëngjesit dhe është finalizuar në mbrëmje me arrestimin e shtatë personave.

Të arrestuarit janë Jovica Mitroviq, Fadil Ismajli, Shaban Terbunja, Goran Llaziq, Bedri Dibrani dhe Nexhmije Karaqi. Fadil Ismajli, i cili është në mesin e të arrestuarve, ka qenë Ministër i Zhvillimit Ekonomik në Qeverinë e Kosovës në vitin 2013.

Prokuroria Speciale e Kosovës ka njoftuar se të arrestuarit po dyshohen për kryerjen e veprave penale si korrupsion, keqpërdorim i detyrës zyrtare, dhënie dhe marrje ryshfeti, ushtrim ndikimi, mashtrim dhe armëmbajtje pa leje.

Të dyshuarit janë kapur në flagrancë gjatë shkëmbimit të parave, ka theksuar Prokuroria Speciale në komunikatë.

Me vendim të Prokurorisë Speciale shtatë personat janë ndaluar për 48 orë. Gjatë kontrollit janë sekuestruar rreth 20 mijë euro para të gatshme, armë, bizhuteri, dokumente të ndryshme dhe pajisje elektronike.