Dy të rinj në pranga pas përplasjes me armë në Laç – pesë të plagosur, motivi një aksident i vogël rrugor

Zbardhen detaje të reja nga ngjarja e rëndë që tronditi qytetin e Laçit mesditën e 3 majit 2025, ku një konflikt që nisi për një aksident të vogël rrugor përfundoi në përplasje me armë, duke lënë të plagosur pesë persona.

Sipas Policisë së Kurbinit, të arrestuarit janë shtetasit Klevis Ndreca, 28 vjeç, dhe Daniel Gjeloshi, 27 vjeç. Dy të rinjtë dyshohet se janë përfshirë në konfliktin me armë zjarri, gjatë të cilit mbetën të plagosur pesë persona, përfshirë edhe vetë Daniel Gjeloshin, i cili ndodhet jashtë rrezikut për jetën.

Ngjarja ndodhi rreth orës 13:27, kur pas një përplasjeje të vogël mes dy automjeteve në një rrugë të Laçit, palët kanë debatuar, duke përshkallëzuar konfliktin në dhunë fizike dhe më pas në përdorim të armëve të zjarrit. Hetimet kanë zbuluar se janë përdorur dy armë zjarri të llojit pistoletë dhe një armë e ftohtë, konkretisht një përforcues grushti.

Në vendin e ngjarjes janë gjetur dhe sekuestruar si prova materiale dy pistoleta të përdorura nga autorët, një përforcues grushti dhe dy automjete që rezultojnë të përfshira në konflikt.

Falë kamerave të sigurisë në zonë dhe veprimeve të shpejta hetimore, Policia ka mundur të zbardhë shpejt dinamikën e ngjarjes dhe të identifikojë autorët. Dy të dyshuarit janë vënë në pranga për veprat penale “Vrasja në rrethana të tjera cilësuese, e mbetur në tentativë” dhe “Mbajtja pa leje dhe prodhimi i armëve, armëve shpërthyese dhe i municionit”.