Një atentat i rëndë ka tronditur fshatin Dragoç, ku 33-vjeçari Ramazan Mataj u ekzekutua me 29 plumba në një rrugë dytësore, rreth 1.2 km larg banesës së tij.

Dyshohet se autori i ka zënë pritë viktimës, duke e nxjerrë nga shtëpia me anë të një mesazhi në rrjetet sociale, dërguar nga një profil fals. Trupi i pajetë i të riut u gjet mëngjesin e ditës tjetër brenda në makinë nga një banor i zonës, i cili më pas njoftoi Policinë.

Hetimet janë përqendruar në pistën e një konflikti personal, i cili mund të lidhet me një marrëdhënie dashurie që ka pasur viktima, por nuk përjashtohet as ndonjë aktivitet i tij jashtë vendit. Vrasja ka ndodhur në një zonë pa kamera sigurie, çka e vështirëson identifikimin e autorit.

Deri më tani, familjarët e Ramazan Matajt kanë deklaruar se ai nuk kishte konflikte me askënd, duke kërkuar drejtësi nga shteti.