Një vajzë nga Elbasani ka denoncuar publikisht një incident të rëndë që i ka ndodhur në një nga rrugët kryesore të qytetit, ku sipas saj është përballur me një drejtues mjeti ag resiv dhe fyes.
Ngjarja ka ndodhur ndërsa ajo po përpiqej të futej në korsinë e duhur të rrugës. Sipas dëshmisë së saj, drejtuesi tjetër jo vetëm që nuk i liroi rrugën, por u përplas qëllimisht me pasqyrën e makinës së saj dhe më pas e ofendoi me fjalor rrugaçëror.
“Makina ime ishte thuajse në korsi, por ai insistoi të futej me forcë. Pasi më goditi pasqyrën, nisi të bëjë gjeste fyese dhe të ulërijë fjalë nga më të ndyrat. Kur e paralajmërova që kishte goditur makinën time, reagoi me agresivitet. Arrita të nxjerr telefonin për ta filmuar, por ai u mundua të fshihej. E vetmja gjë që arrita të regjistroj është një gjest i turpshëm prej tij,” shkruan vajza në denoncimin e saj.
Sipas saj, ngjarja është parë nga shumë dëshmitarë që ndodheshin në zonë në atë moment, ndërsa ajo kërkon që rasti të publikohet për të demaskuar sjelljen e këtij drejtuesi dhe për t’i dhënë një mësim për herë tjetër.
“Është turp që në vitin 2025 ende kemi të bëjmë me njerëz të tillë që përçojnë agresion dhe mungesë totale respekti në rrugë. Ky person duhet të mbahet mend dhe të ndëshkohet për sjelljen e tij të ulët,” përfundon ajo.
Mesazhi i plotë i vajzës:
“Përshëndetje JOQ. Jam një vajzë që u përballa me një situatë aspak të këndshme me një mashkull të ulët në rrugët e Elbasanit. Po përpiqesha të futesha në korsinë time, ndërsa ai nuk më la hapësirë dhe, për më tepër, u afrua dhe më goditi pasqyrën e shoferit. Makina ime ndodhej thuajse në korsinë e duhur, por ai insistoi dhe hyri me forcë.
Pavarësisht faktit që më kishte penguar dhe më kishte dëmtuar makinën, filloi të bënte gjeste me duar. I dola paralel për t’i thënë: ‘Ose liroje rrugën, ose kalo, por bëj kujdes se më godite pasqyrën.’ Në atë moment, ai shpërtheu duke më ofenduar me fjalët më të ndyra, si një rrugaç i vërtetë.
Nxora telefonin për ta filmuar, por ai u përpoq të fshihej. E vetmja gjë që arrita të kap në video ishte një gjest i turpshëm. Kjo është një rrugë kryesore, dhe aty kishte plot dëshmitarë që e dëgjuan duke bërtitur dhe sharë.
Ju lutem, publikojeni këtë si formë demaskimi. Le të marrë mësim herën tjetër ky njeri i paturpshëm dhe të ketë kujdes se çfarë sjelljesh shfaq në rrugë. Plërat nuk kanë vend në qytet!”
