Një ngjarje e rëndë ka tronditur fshatin Scortichino, në komunën Bondeno të zonës së Ferrarës në Itali, ku është zbuluar trupi i pajetë i një gruaje 90-vjeçare, i mbështjellë me celofan dhe i fshehur në garazhin e banesës së saj.

Zbulimi u bë nga karabinierët, të cilët njoftuan menjëherë Prokurorinë dhe nisën një hetim për fshehje kufome dhe mashtrim ndaj shtetit.

Në qendër të hetimeve ndodhet djali 54-vjeçar i viktimës, i cili ka pranuar se e kishte fshehur trupin e nënës me qëllim që të vazhdonte të përfitonte pensionin e saj.

Autoritetet po shqyrtojnë edhe rolin e një personi të dytë, i cili është gjithashtu nën hetim.

Rezultatet e autopsisë do të jenë thelbësore për të saktësuar shkaqet dhe kohën e vdekjes, e cila dyshohet se ka ndodhur që në muajin janar.

Ngjarja ka shkaktuar tronditje në komunitetin lokal dhe ka ngritur alarmin për raste të mundshme të abuzimit me skemat e pensioneve. Hetimet vijojnë për të zbardhur plotësisht këtë rast të rëndë.