Artjola Sallahu, motra e të ndjerit Rushit Sallahu, ka dalë nga qelia dhe është lënë në masën e sigurisë “arrest në shtëpi” nga Gjykata e Kukësit. Dy ditë më parë, kjo shtetase ka rrahur fqinjët e saj të moshuar për shkak të një konflikti 20 vjeçar për një copë rrugë.

Mirëpo, ky sherr në dukje banal është bërë shkak për një krim të rëndë që tronditi dje Hasin. Dy fqinjët e dhunuar nga Artjola janë prindërit e shtetasit Ylber Jaku, 41 vjeç, i cili sapo ka mësuar për ngjarjen është kthyer menjëherë nga Anglia.

Dje, më datë 7 Maj, Ylber Jaku ka marrë kallashnikovin në shtëpi dhe ka pritur në rrugë vëllain e Artjolës, shtetasin Rushit Sallahu.

Sapo i riu është afruar me mjetin e tij Mercedes Benz në rrugën pranë shtëpisë, Ylber Jaku ka hapur zjarr me breshëri plumbash dhe e ka lënë 34 vjeçarin të vdekur në vend. Makina përfundoi gjithashtu në kanal.

Neglizhenca e autoriteteve dhe konflikti i pazgjidhur 20 vjeçar ka bërë që dje Rushit Sallahu të humbiste jetën, kurse emigranti i kthyer nga Anglia, Ylber Jaku me gjasë do ta kalojë pjesën tjetër të jetës prapa hekurave sepse vrasja është kryer me dashje.

21 vjeçarja Artjola Sallahu është kthyer në shtëpi me vendim të gjykatës këtë të enjte, pasi qëlloi me lopatë dy prindërit e moshuar të Ylberit dhe e nxiti këtë të fundit të kthehej nga Anglia dhe të merrte hak duke i vrarë të vëllanë, ama ajo nuk mund të kthejë dot në shtëpi Rushitin.

I vëllai 34 vjeçar u vra për një copë rrugë, e cila sidoqoftë tashmë do të mbushet me ferra sepse dy familjet që u konfliktuan 20 vjet rresht për të, tashmë janë ngujuar.