Vladimir Lleshi 37 vjeç, ka humbur tragjikisht jetën pas një goditje me mjet prerës në zemër pas një sherri banal në Itali.

Autorë të kësaj ngjarje janë dy adoleshentë shqiptarë të moshës 17 dhe 19 vjeç, tashmë të arrestuar nga policia vendase. Ngjarja ka ndodhur mbrëmjen e djeshme rreth orës 19:00 në rrugën Corridoni. Shkak për nisjen e konfliktit mes tyre mësohet të jenë bërë disa mesazhe që Lleshi i kishte dëguar një vajze.

Sipas asaj që raportohet në mediat italiane, në dëshminë e dhënë përpara autoriteteve, të rinjtë shqiptarë kishin lënë të takoheshin me Vladimir Lleshin në afërsi të vendit ku dhe ka ndodhur ngjarja, ndërsa janë shprehur se 37-vjeçari ka mbërritur i shoqëruar nga dy persona të tjerë.

Në atë moment midis tyre ka nisur një përplasje verbale, e cila më pas ka degraduar në përleshje fizike. Sipas dëshmisë së të rinjve shqiptarë, të rriturit kanë tentuar t’i sulmojnë, moment në të cilin të rinjtë janë larguar dhe më pas njëri prej tyre është kthyer dhe ka goditur me kaçavidë në zemër 37-vjeçarin.

Pavarësisht ndërhyrjes mjekësore, shqiptari nuk ka mundur t’i mbijetojë plagëve të marra. Sakaq autoritetet po vijojnë hetimet për dokumentimin e plotë të ngjarjes.