Policia e Pogradecit ka arrestuar përfaqësuesin e Partisë Demokratike në Pogradec, Luan Tollozhina, i cili gjatë paradites së sotme dhunoi komisionerin e qendrës së votimit Enton Gega, përfaqësues i Partisë Socialiste.

Tollozhina akuzohet për veprat penale “Kanosja apo dhunimi ndaj pjesëmarrësve ne zgjedhje” dhe “Goditjet për shkak të detyrës”. Sipas policisë, sherri ka nisur pasi vajza e Tollozhinës ka pasur një debat me Enton Gegën, sa i takon votimit të personave me aftësi ndryshe dhe të moshuar, nëse do të lejohet të votojnë me shoqërues.

Debati ka agravuar deri në kontakte fizike mes Tollozhinës dhe Gegës. Luan Tollozhina u shoqërua dhe më pas u arrestua nga policia.

Por sherri nuk ka ndaluar me kaq! Rreth orës 13:00, nipat e Luan Tollozhinës, shtetasit me inicialet R. T., E. M., dhe D. M., kanë shkuar në banesën e komisionerit e Entin Gegës dhe kanë dhunuar familjarët e tij, mes tyre bashkëshorten dhe djalin. Për pasojë djali ndodhet në spital jashtë rrezikut për jetën, ndërsa bashkëshortja ndodhet në komisariat për të bërë një kallëzim.