Të paktën 21 pasagjerë të një autobusi që transportonte pelegrinë budistë u vranë dhe 24 të tjerë u plagosën të dielën në mëngjes në Sri Lankën qendrore, kur automjeti u rrëzua në një përrua, tha zëvendësministri i transportit.

“Njëzet e një persona kanë vdekur, jemi në proces të identifikimit të tyre”, tha për shtypin Prasanna Gunasena, e cila nxitoi në vendngjarje. “Të plagosurit u dërguan në dy spitale”, shtoi ai.

Autobusi – i cili mbante 70 persona, ndërsa kishte një kapacitet maksimal prej 50 vendesh po udhëtonte natën në kodrat në rrethin Kotmale kur shoferi humbi kontrollin, tha policia.

“Autobusi po anonte majtas dhe kur shoferi mori një kthesë humbi kontrollin dhe autobusi ra” në një përrua, i tha një pasagjer i mbijetuar shtypit të Sri Lankës në kushte anonimiteti.

Një hetim është duke u zhvilluar për të përcaktuar rrethanat e aksidentit.

“Po përpiqemi të kuptojmë nëse automjeti ka pësuar ndonjë defekt mekanik apo nëse shoferi ka rënë në gjumë në timon”, tha një oficer policie për AFP-në në kushte anonimiteti.

Mjeti, që i përkiste një kompanie transporti publik, ishte nisur nga qyteti i Kataragama-s, në jug të Sri Lankës, drejt Kurunegala-s (veriperëndim), një distancë prej rreth 250 kilometrash.

Ky është aksidenti rrugor më vdekjeprurës në ishullin e Azisë Jugore në njëzet vjet: një përplasje treni dhe autobusi në vitin 2005 vrau 37 persona në pjesën veriperëndimore të vendit.

A passenger bus skidded off a cliff in Sri Lanka’s tea-growing hill country on Sunday, killing 21 people and injuring 35 others. pic.twitter.com/NjipaJlFw7

— T_CAS videos (@tecas2000) May 11, 2025