Një artikull kritik nga televizioni publik gjerman ARD hedh dyshime serioze mbi mënyrën se si Edi Rama dhe Partia Socialiste siguruan fitoren e katërt radhazi në zgjedhjet parlamentare të Shqipërisë.

Sipas raportimit të ARD-së, nuk është vetëm opozita që flet për parregullsi — edhe vëzhgues ndërkombëtarë kanë shprehur shqetësime mbi pabarazinë dhe ndikimin e pushtetit në procesin zgjedhor.

Amnisti e gjobave, një dhuratë elektorale?

ARD vë në dukje një veprim të qeverisë shqiptare që ka ndezur debat: vetëm dy ditë para zgjedhjeve, qeveria shqiptare fali gjoba për 170 mijë qytetarë, një lëvizje që opozita e ka quajtur hapur një “dhuratë elektorale” në vlerë prej 150 milionë eurosh. Ish-kryeministri dhe lideri i opozitës, Sali Berisha, ka denoncuar ashpër këtë veprim, duke e quajtur një blerje të pastër të votës. Ai ka thirrur mbështetësit në protesta.

Kritika të forta kanë ardhur edhe nga misioni i OSBE/ODIHR. Vëzhguesit vlerësuan se procesi i votimit u zhvillua në mënyrë të qetë, por theksuan se Partia Socialiste përfitoi nga përdorimi i burimeve shtetërore gjatë fushatës, duke krijuar kushte të pabarabarta konkurrimi. Farah Karimi, një nga drejtueset e misionit, theksoi se kishte indikacione për presion ndaj votuesve, veçanërisht ndaj punonjësve të sektorit publik.

ARD citon gjithashtu shqetësimet për lirinë e medias në Shqipëri. Sipas raportit të OSBE-së, dominimi i dy partive kryesore në mbulimin mediatik dhe vetëcensura e gazetarëve kanë ndikuar në pamundësinë e qytetarëve për të bërë një zgjedhje të mirëinformuar.

Eurodeputeti gjerman Michael Gahler (CDU) paralajmëron se, nëse situata nuk ndryshon, Shqipëria nuk mund të bëhet anëtare e Bashkimit Evropian. Ai kërkon zbatim të rekomandimeve të OSBE-së dhe përparim në reformën zgjedhore. Sipas tij, injorimi i këtyre reformave është një rrezik për kursin evropian të vendit.

Kryeministri Rama ka qenë i qartë në premtimin e tij kryesor: integrimin e Shqipërisë në Bashkimin Evropian deri në vitin 2030. Por kritikët janë skeptikë nëse ai do ta përdorë shumicën e thellë për të zbatuar reforma demokratike, apo për të konsoliduar më tej pushtetin.

ARD përmbyll raportimin me një analizë të gazetarit Frrok Çupi, i cili thotë se kjo fitore nuk është vetëm partiake, por edhe një reagim i një shumice borgjeze që kërkon stabilitet dhe ecje drejt BE-së. Megjithatë, pyetja qëndron: A do ta shfrytëzojë Rama këtë fitore për reformat që kërkon Brukseli, apo për forcimin e kontrollit të pushtetit të tij?