Numërimi i votave për kandidatët me votë preferenciale në Qarkun e Tiranës vijon ende dhe deri më tani janë numëruar 828 nga 1282 kuti votimi.

Rezultatet paraprake kanë krijuar një projeksion të qartë për përbërjen e re të deputetëve të Partisë Socialiste që do të përfaqësojnë këtë qark në Parlamentin e ri.

Partia Socialiste ka siguruar 19 mandate në Qarkun e Tiranës. Nga këto, 12 shkojnë për kandidatët e listës së sigurt, të cilët marrin automatikisht mandate në bazë të votave për logon e partisë. Ndërkohë, gara për 7 mandatet e mbetura është zhvilluar mes kandidatëve të listës së hapur.

Blendi Gonxhja kryeson me diferencë, duke marrë 17420 vota preferenciale. Pas tij renditet ministri Ervin Hoxha me 14349 vota. Më tej vijnë figurat e njohura të PS-së si Erion Braçe (13822 vota), Fatmir Xhafaj (9672), Ornaldo Rakipi (6768), Anila Denaj (4 903), dhe Olta Xhaçka, që ka grumbulluar 4357 vota.

Por jo vetëm kaq pasi për shkak të kuotave gjinore, Xhaçka ka rrugën e hapur drejt Kuvendit, ndërkohë që deputeti aktual Xhemal Qefalia, me 6484 vota, nuk siguron dot mandatin.

Rezultatet paraprake tregojnë gjithashtu largimin nga Kuvendi të disa prej figurave të vjetra të PS-së, si Pandeli Majko, Klotilda Bushka dhe Mimi Kodheli, të cilët nuk kanë arritur të sigurojnë mbështetje të mjaftueshme për të qëndruar në Parlament.