Një nga atraksionet natyrore dhe historike të Shqipërisë, Kepi i Rodonit, po përballet me një ndotje alarmante.

Vizitorë të shumtë kanë raportuar për praninë masive të mbeturinave në çdo cep të zonës – përgjatë rrugës, në shkurre, buzë detit dhe madje edhe pranë Kalasë së Skënderbeut.

Pamjet që ofron sot ky destinacion turistik janë shumë larg asaj që promovon Shqipëria në fushatat për turizmin.

“Është për të ardhur keq të shohësh një vend kaq të bukur në këtë gjendje. Turistët që ndodheshin aty tregonin me habi dhe keqardhje se nuk e prisnin diçka të tillë nga një vend që synon të tërheqë vizitorë nga e gjithë bota”, thotë një qytetar që ndau shqetësimin me redaksinë tonë.

Ndërkohë që hyrja në zonë është me pagesë, nuk ka asnjë lloj mirëmbajtjeje apo përkujdesje nga institucionet përkatëse.

Qytetarët kërkojnë reagim urgjent nga autoritetet për të shpëtuar Kepin e Rodonit nga shkatërrimi dhe për ta kthyer në një destinacion të denjë për turizmin shqiptar dhe të huaj.

Denoncimi i qytetarit:

Përshëndetje JOQ, Desha të ndaj me ju një situatë shqetësuese. Kepi i Rodonit, që dikur njihej si një nga vendet më të bukura natyrore dhe historike të Shqipërisë, është kthyer në një landfill të vërtetë. Në çdo hap has mbeturina – nëpër rrugë, shkurre, madje edhe buzë detit, pranë Kalasë së Skënderbeut. Është për të ardhur keq si një pasuri kombëtare është lënë në mëshirë të fatit, pa asnjë kontroll apo pastrim nga institucionet. Disa turistë që ishin aty flisnin me keqardhje dhe habi për gjendjen e zonës, duke thënë se nuk e prisnin diçka të tillë nga një destinacion që promovon turizmin. Vlen të theksohet që hyrja është me pagesë, por zona nuk mirëmbahet fare. Shpresoj ta bëni publik këtë problem, që ndoshta dikush të reagojë.