Britani/ Shqiptari kërkon azil si homoseksual, por zbulohet i martuar me grua – gjykata e refuzon

Një shtetas shqiptar, Esmir Demaj, ka humbur betejën për azil në Mbretërinë e Bashkuar pasi autoritetet britanike zbuluan se kishte mashtruar lidhur me orientimin e tij seksual.

Demaj, i cili kishte paraqitur kërkesën për azil në vitin 2023 duke pretenduar se ishte homoseksual dhe i përndjekur në Shqipëri për këtë arsye, u përball me fakte kundërshtuese gjatë procesit gjyqësor. Zyra e Brendshme britanike (Home Office) solli si provë faktin që ai ishte i martuar me një grua dhe kishte krijuar marrëdhënie heteroseksuale.

Gjykata e Lartë e Tribunalit të Azilit dhe Imigracionit e hodhi poshtë kërkesën dhe më pas edhe apelimin e tij, duke e cilësuar si një përpjekje të qëllimshme për të manipuluar sistemin e azilit dhe për të përfituar në mënyrë të padrejtë të drejtën për qëndrim në Mbretërinë e Bashkuar.

Rasti ka ngjallur diskutime mbi abuzimet e mundshme në sistemin e azilit dhe mënyrën se si deklarata të rreme mund të përdoren për të fituar përfitime emigracioni. Sipas Konventës Evropiane për të Drejtat e Njeriut, personat që rrezikojnë persekutim për shkak të orientimit seksual kanë të drejtë të kërkojnë mbrojtje ndërkombëtare, por në këtë rast gjykata vlerësoi se pretendimi nuk ishte i sinqertë.