Një alarm i fortë është ngritur për atë që po ndodh në Zonën e Mbrojtur Vjosë–Nartë, një nga perlat natyrore të Shqipërisë dhe Evropës, ku pritet të ndërtohet një qytet i ri turistik me mijëra dhoma – nën emrin e Jared Kushner, dhëndri i presidentit amerikan Donald Trump.

Ky projekt gjigand do të ngrihet pikërisht aty ku po ndërtohet edhe Aeroporti Ndërkombëtar i Vlorës, në zemër të një peizazhi të mbrojtur nga ligji dhe i pasur me biodiversitet të rrallë. Dunat shekullore ku riprodhohen breshkat e rralla të detit (Caretta caretta), si dhe dhjetëra lloje shpendësh të kërcënuar, rrezikojnë të zhduken përgjithmonë, për t’i lënë vendin betonit, asfaltit dhe dritave të një qyteti artificial.

Skandali thellohet më tej kur zbulohet se ky zhvillim është bërë i mundur pasi qeveria shqiptare ndryshoi ligjin për Zonat e Mbrojtura në vitin 2023 – një vendim i marrë pa asnjë konsultim me Bashkimin Evropian dhe pa transparencë publike. Ndryshimi ligjor u cilësua nga ambientalistët si “goditja fatale” ndaj natyrës së mbrojtur të Shqipërisë.

Edhe më shqetësuese është mënyra si ky zhvillim po kalon thuajse në heshtje: një pjesë e madhe e mediave vendase kanë shmangur raportimin e saktë të vendndodhjes së projektit, duke lënë të kuptohet se bëhet fjalë për një zhvillim në ishullin e pabanuar të Sazanit – dhe jo në deltën e Vjosës, që është një nga habitatet më të rëndësishme të biodiversitetit në rajon.