Një situatë e tensionuar është raportuar nga një pasagjere shqiptare, e cila po udhëtonte nga Tirana drejt Londrës mëngjesin e datës 3 janar 2025.
Sipas saj, pasagjerët janë mbajtur për më shumë se tre orë brenda avionit pa asnjë njoftim të qartë për vonesën, duke shkaktuar indinjatë dhe zemërim tek të gjithë të pranishmit.
Pasagjerja shprehet se një stjuardesë e Wizz Air ka treguar mungesë respekti dhe komunikimi, duke trajtuar pasagjerët në mënyrë jo të denjë.
Një incident veçanërisht i rënduar ndodhi kur në vend që situata të qetësohej, sipas dëshmitarëve, një anëtare e kabinës kërcënoi pasagjerin me zbritje nga avioni, duke përshkallëzuar edhe më tej tensionet.
DENONCIMI I PLOTË
“Mirëmëngjes! Kemi 3 orë që na mbajnë në avion dhe kjo është kulmi. Po na trajtojnë si të ishim kafshë. Mirë që nuk na thonë ose na lajmërojnë që do të kemi vonesa, por edhe kur i pyesim sa gjatë do të na mbajnë në avion, ata na trajtojnë si të ishim kafshë.
Mënyra si flet ai burri nuk është e mirë, por ai tha: “E kam mënyrën e të folurit kështu.” Ndërkohë, stuardesa, në vend që të qetësonte situatën, e acaroi edhe më shumë. Ajo i tha: “Do të jap urdhër që të të zbresin nga avioni.” Ai iu përgjigj stuardesës: “Po zbres unë, të gjithë do të zbresin me mua!” Ndërsa ajo i tha: “Kur të zbresësh ti, do të zbresin edhe të tjerët me ty.”
Kjo ndodhi më 3 janar, në orën 5 të mëngjesit. Ky është një fillim viti shumë i “mbarë” për ne refugjatët dhe për ne shqiptarët, që gjithmonë trajtohemi keq kudo që shkojmë.
Jemi në vitin 2025 dhe ende vuajmë si komb. Kjo është çmenduri! Jam një pasagjere që po udhëtoj Tiranë-Londër.”
