Një atentat me armë zjarri ka ndodhur mbrëmjen e sotme në zonën e Fllakës në Durrës, ku një person është qëlluar me armë zjarri nga persona të paidentifikuar teksa po lëvizte me makinë.

Bëhet fjalë për 36-vjeçarin Arbër Goreja, i cili ka mbetur i plagosur nga sulmi i kryer.

Pavarësisht plagës së marrë, ai ka arritur të shkojë vetë deri në një stacion policie për të kërkuar ndihmë.

Më pas ai është transportuar menjëherë në Spitalin Rajonal të Durrësit, ku ndodhet nën kujdesin e mjekëve, jashtë rrezikut për jetën.

Raportohet se 36-vjeçari është në sallën e operimit, ku po i nënshtrohet një ndërhyrjeje kirurgjikale.

Policia ka shkuar në vendngjarje dhe po punon për zbardhjen e rrethanave të sulmit.

Njoftimi i Policisë:

Rreth orës 20:00, në zonën e Fllakës, dyshohet se për motive të dobëta është plagosur me armë zjarri shtetasi A. G., 36 vjeç, banues në Durrës, aktualisht jashtë rrezikut për jetën.

Shërbimet e Policisë dhe Grupi hetimor ndodhen në vendngjarje dhe vijojnë kontrollet dhe hetimet për identifikimin dhe kapjen e autorit, sqarimin dhe dokumentimin ligjor të rrethanave të ngjarjes.