Tiranë, 4 qershor 2025 – Zhvendosja masive e rinisë dhe punonjësve të tjerë drejt bregdetit gjatë sezonit veror ka shkaktuar mungesë të ndjeshme të kamarierëve dhe banakierëve në kryeqytet. Vetëm gjatë dy muajve të fundit, agjencitë e punësimit kanë regjistruar rreth 300 vende të hapura pune në këtë sektor në Tiranë, duke dëshmuar vështirësitë që përballen baret dhe restorantet për të gjetur staf.

Ekspertja për punësimin, Flora Xhamani Baba, thekson se fluksi i klientëve në Tiranë zvogëlohet në verë, por mungesa e personelit mbetet problem për njësitë vendore, ndërsa baret në bregdet kompensojnë mungesën duke rekrutuar punonjës nga jashtë.

Rritja e ofertave sezionale në jug, pagat që arrijnë deri në 1,200 euro për kamarierë, dhe praktika e punës joformale pa kontratë, po nxisin këtë zhvendosje të punonjësve. Ekspertja shton se mungesa e një tregu pune të rregulluar e shtyn stafin të braktisë punën edhe në mes të sezonit, duke kërkuar mundësi më të mira pagese.

Tirana renditet ndër qytetet me numrin më të lartë të bareve dhe restoranteve në Europë, me rreth 67 të tillë për 10 mijë banorë, duke e bërë mungesën e punonjësve problem serioz për këtë sezon veror.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.