Një ngjarje që mund të cilësohet si mrekulli ka ndodhur sot në Bulqizë, ku një 27-vjeçar është gjetur me shenja jete brenda një automjeti të aksidentuar, dy ditë pas ngjarjes.
I riu u zbulua pranë urës së Çeranecit, në aksin rrugor Bulqizë–Peshkopi, nga disa fëmijë që po laheshin në zonë. Ata kanë njoftuar menjëherë banorët për makinën e përmbysur në zall.
Pas sinjalizimit të banorëve, në vendngjarje mbërriti një autoambulancë dhe 27-vjeçari u transportua me urgjencë drejt spitalit të Bulqizës për ndihmë mjekësore. Gjendja e tij shëndetësore nuk është bërë ende e ditur.
Paraprakisht dyshohet se aksidenti ka ndodhur dy ditë më parë dhe për shkak të terrenit të vështirë dhe mungesës së dëshmitarëve, ngjarja nuk ishte zbuluar më herët.
Policia ka nisur hetimet për të zbardhur rrethanat e plota të aksidentit.
