Operacioni ushtarak në Montecristi zbulon strehimin sekret të Jose Adolfo Macias, falë pranisë së vajzës së tij 3-vjeçare në vendngjarje

Operacioni për kapjen e Jose Adolfo Macias Villamar, i njohur si “Fito”, nisi në orët e para të 25 qershorit 2025 në Montecristi, Ekuador. I kërkuari më i rrezikshëm i vendit dhe kreu i grupit kriminal “Los Choneros” fshihej në një vilë luksoze në një zonë të qetë, ku patrullat ushtarake ndërhynë pa zhurmë, bazuar në informacione të ndjekura prej muajsh nga shërbimet e inteligjencës.

Shtëpia që po survejohej prej kohësh i përkiste Cristian Germán Mendoza Vélez, një punonjës i kompanisë “Manta Mobility”, që prej një viti kishte zhdukur çdo gjurmë pune. Hetuesit zbuluan se Mendoza ishte një nga truprojat kryesore të “Fito”-s. Megjithëse prona ishte bastisur disa herë më parë, vetëm këtë herë u zbuluan të dhëna vendimtare.

Në banesë u gjetën katër burra, dy gra dhe një vajzë 3-vjeçare. Kur vajza nisi të përsëriste fjalën “baba” vazhdimisht, agjentët kuptuan se ajo ishte vajza e “Fito”-s dhe të dashurës së tij Verónica Briones, aktualisht e burgosur për pastrim parash. Kjo ishte prova e parë që ai ndodhej aty. Kontrolli vijoi dhe ushtarakët zbuluan armë, municione, si dhe medikamente që përputheshin me gjendjen shëndetësore të bosit të drogës, përfshirë insulinën për diabetin.

Gjurmët e fundit çuan tek një zbulim tronditës: pas një skanimi me teknologji speciale, u evidentua një hapësirë boshe pranë një oborri. Pas disa orësh gërmime me pajisje mekanike, u arrit në një bunker të fshehur, i maskuar në mënyrë perfekte. Në këtë dhomë të nëndheshme, “Fito” qëndronte prej muajsh, i pajisur me një dyshek, kondicioner, televizor dhe ushqime të bollshme. Ai doli vullnetarisht duke pranuar se kishte shpëtuar disa herë gjatë bastisjeve të mëparshme.

Pasi u arrestua, “Fito” pranoi se kishte urdhëruar rojet të mos hapnin zjarr në rast ndërhyrjeje, për të mos rrezikuar vajzën e tij. Ai gjithashtu deklaroi se dëshironte të ekstradohej në SHBA, duke shprehur frikë për jetën e tij në burgjet e Ekuadorit. Mediat ndërkohë kanë raportuar më herët lidhje të forta mes mafies shqiptare dhe grupeve kriminale në Ekuador, me përfshirje të drejtpërdrejtë në trafikun ndërkombëtar të kokainës, ku “Fito” luante një rol kyç.